《第五十五日後……》
由婦女節開始，意大利足足封城八個星期。
意大利至今超過21萬人感染，新增個案算是放緩了。
而由依家到5月中……都仍然未解封，不過開始咗Phase 2。
Phase 2 即係乜呢？簡單嚟講冇Phase 1咁嚴，擺脫家居200米活動範圍規限，不過以下情況如果俾警察捉到都要罰錢。我盡人屎講解，你哋睇吓明唔明呵~
經過我同意佬孖咇出巡目測後，我哋同好多意大利人一樣都有問題想問，睇吓你哋解唔解答到🤭
🤓如果出街跑步可以唔洗戴口罩，但散步最好要戴。
🤷🏻♀️咁如果我跑跑吓想行呢？
🤓可以喺同一區內探親戚，但唔可以坐低食飯。
🤷🏻♀️警察逐家逐戶敲門睇吓有冇人食飯？
🤓可以去探男女朋友，但必須要感情穩定。
🤷🏻♀️如果有多於一個女朋友但都係感情穩定呢？
🤷🏻♀️唔探係咪即係默認想斷纜？
🤓Cafe同餐廳&麵包舖只能做外賣生意。
🤷🏻♀️但姐姐用手套攞完上一個客啲錢，跟住用同一對手套幫我攞麵包噃？
🤓可以去公園，露天公眾運動設施，但需保持一米距離
🤷🏻♀️但行山徑同公園都巧多人喎，個個堆埋一齊點算？
🤓婚禮、葬禮、洗禮可舉行，不過唔準超過15人參加，行禮時新郎新娘都要全程戴口罩，包括神父宣布新郎可以親吻新娘子都要戴住。
🤓去親邊都仍然要攞行街紙。
除咗以上迷團，我同意佬一路開車，沿途見到街上好多人將口罩戴喺條頸度，戴喺個鼻下面，戴住口罩行貼臉禮，口罩喺手度 fing, fing 甩咗喺地下又執返嚟戴🤦🏻♀️見到眼前一切，我哋更迷......
嗚啊～媽啊～巧驚囉！我哋好似入咗zombieland咁🧟♂️，走都走唔切，連車窗都唔敢開驚啲菌會漂咗入車😅
依家可以兩個人坐一架車，我哋都係快閃一轉超市就碌返屋企全身消毒穩陣啲！
#意大利解封
#抗疫第二階段
#迷
#等咗三個月
#意大利政府終於叫人戴口罩
#髮型屋6月先重開
#意佬表示髮根生草好抑鬱
Search